EtnoMet (Aroaren berbaroak)

2004ko azaroaren 1ean sortua. Eguraldiaren gainean mintzatzeko gunea: zer-nolako ikuspegia daukan herriak eguraldiarekiko, zein hitz erabiltzen den ahozko euskaran fenomeno atmosferiko jakinak izendatzeko. Sasoi edo egun batzuetan dagoen eguraldiaren aitzakian, iruzkinak egiteko herri-gunea.

2012/02/21

Eguraldia armatzat

GAUR8.info
TEKNOLOGIA - Iratxe Esnaola
2012ko Otsailaren 17a
Asko hedatu ez den arren, eguraldiaren kontrola ahalbidetzen duen teknologia existitzen dela entzun izan ahal dugu han edo hemen. Proiektuak HAARP izena du, ingelesezko High Frecuency Advanced Auroral Research Project izenaren akronimoa dena [http://www.haarp.alaska.edu/]. Alaskako instalazio militar batzuetan kokatuta dagoen 180 antenako eremu batean garatzen da. Antena horiek guztiak batera funtzionatzen dute eta antena bakar batek bilioi bat watt bidaliko balitu bezala da, atmosferan zuzenean sartzeko.
Alaskan kokatuta dagoen HAARP proiektua Ameriketako Estatu Batuetako Marina eta Aireko Indarrek garatzen dituzten proiektuetako bat gehiago da. Alegia, AEBetako Defensa Departamentuaren beste proiektu militar bat.
Baina nola funtzionatzen du? Antena horiek guztiek, modu artifizialean, pultsuak igortzen dituzte. Pultsu horiek ionosfera estimulatzen dute, beheko atmosferaren baitan distantzia handiak egin ditzaketen uhinak sortuz. Uhin horiek lurrean sartzen dira azkenik, misilen biltegiak edota lurrazpiko tunelak bilatzeko aukera emanez. Baita ur azpian dauden urpe-ontzi eta itsaspekoekin komunikatzeko aukera ere. Hori eta gehiago ahalbidetzen du HAARPek.
Funtsean, potentzia ikaragarria duen berogailu ionosferiko gisa defini daiteke HAARPa: munduko berogailu ionosferiko indartsuena. Eta, zentzu horretan, pertsonak sortu duen arma geofisiko sofistikatuena dela baiezta daiteke.
Asko dira, ordea, proiektu honen atzean mundua manipulatzeko saiakera bat ikusten dutenak. Klima aldatzeko gaitasuna lortzeko helburua balu bezala. Edota pertsonon buruak kontrolatzeko beste modu bat sortzekoa, atmosferaren frekuentziak eraldatuz. Eta bada halaber lurrikarak probokatzeko tresna bat dela dioenik.
Egia da berogailu ionosferiko potentea dela eta horrek neurgaitzak diren ondorioak sor ditzakeela. Are gehiago, antenen «ispilu efektua»-gatik, berogailu horren ondorioak planetako edozein zonaldetara bidera daitezkeela. Beraz, arma mota berri batez hitz egiten ari garela esan daiteke, ekaitzak areagotzeko gai dena, lehorteak iraunarazi edo luzatzeko indarra duena, balizko «etsaiaren» lurretan eraginez, «etsaia» bera konturatu gabe.
HAARP proiektua, hortaz, polemikoa bezain arriskutsua da. Bere sortzaile eta defendatzaileek izaera zientifiko, geofisiko eta militarreko abantailak argudiatzen dituzte proiektuaren existentzia defendatzeko. Baina aurkariek ondorio katastrofikoak sor ditzakeen arma baten aurrean gaudela diote, ionosfera sakon aldatzeko gaitasuna eta, gainera, pertsonen garunetan eragiteko ahalmena duelako, frekuentzia baxuko uhinak frekuentzia altuko uhin bilakatzearen bitartez. HAARParen sortzaile Bernard Eastlundek onartzen du, bere asmakizunak klima kontrolatzea ahalbidetzen duela. Beldurra ematen du, aitortzen dut.
Hori guztia oinarritzat hartuta, Japoniako tsunamia probokatua izan zela baieztatzen du batek baino gehiagok. HAARPeko datuak analizatuz aurreikusi omen zen. Eta Japoniari guda meteorologikoaren mehatxua egin zioten ordurako, AEBren baldintza finantzarioetara egokitzen ez bazen. Hugo Chavezek bere aldetik, Haitiko hondamendia AEBk eragin zutela adierazi zuen. Sobietar Marinak eman omen zion honen berri. Eta Pakistanen eta Iranen ere HAARParen gaineko konspirazioak sortu dira.
Argi dago oraindik ez dela arma gisa publikoki aurkeztu. Baina horrek ez du esan nahi, beharbada, arma gisa erabili ez denik. Eta, hortaz, erasoak existitu ahal izan direla, gerra deklaraziorik gabe. HAARParen sorkuntzak milaka milioiko inbertsioa ekarri zuen eta urtez urte aurrekontu handiagoa du. Eta esango nuke AEBtako Defentsa Departamentuak ez duela dirutza hori klima aztertzeko soilik erabiltzen.
 
Contador gratis contadorplus.com -----------------------------------------------------------------