Iraila ere agorrila bada

Zail dago aroa, aspaldion, zail. Azken hilabeteotan euri txikiak izan dira, lantzean behin ekaitzen bat eta kitto, euri noiz-behinkariak. Lehorretik doa kontua, bai. Agorraldian sartuak gara, inork ezertxo ere aipatu ez arren. Gainera, irailari irizteko izenen artean agorrila ere badugu; ez ahal du honela iraungo! Otxandion esaten duten moduan, "eguraldi gogor honek jarraituten badau..." Hala ere, gaurtik aurrera aldaketa zenbait zantzu sumatzen dira: antizikloi handi samarra Eskandinavia aldean etzan, ipar-ekialdeko haizetea ekarri eta gure aldean behe-presioak nagusituko omen dira. Hagitz aro lardatsa izango dugu asteon eta gainera, asteazkenean, ostegunean eta larunbatean garta-denborak egokitzen zaizkigu. Euritsuak eta ipar-haizetsuak ote?