"Eguzki errea zan gaur, mendi ortan. San Migeldia da-ta!"

...jasotzen du Mokoroak bere hiztegi zoragarrian. Inoiz gutxitan egiten du huts; egun honetantxe edo inguruan nola edo halako "udalditxo"-ak erasaten digu batzuen atsegingarri eta beste batzuen ernegagarri. Izan ere, arratsaldeko 16:20an Deustuko estazio meteorologikoan 23,1ºC izatea ez da euli kaka, ez horixe! Bestalde, "San Migel" euskal lexiko etno-meteorologikoan beste zenbait arlotan ere azaltzen zaigu: adibidez, "San Migelen zubia" erabiltzen omen da Mañarian -Urkiolaren azpian- ostadarrari irizteko; Sakanako Urdiain herrian "San Migel haizea"deitzen diote ekialdetiko haizeari... Aralar aldetik etortzen zaien haizeari, alegia. Jakina, "Miguelico" haizea bestelakoa da eta urakanaren parekotzat jo liteke.