Eguzkiz beterik ere, apirila marrantemaile

Behin opor luzexkok amaiturik, ostera ere badator EtnoMet bere ohiko jardunari loturik. Ezeri ekin baino lehen, duela zenbait aste txertaturiko berrikuntzen gainean jarriko zaituzte: batetik, "EtnoAroa" kendu eta horren ordez "Aroaren berbaroak" ezarri. Zer dela-eta? Blog honen funtsa berbetan datzanez, egokiago iritzi diot hitz-jolas hori ipintzeari. Badakizue "berbaro" elea Mendebaldeko euskaran berben hotsak direla. Hori dela-eta, neure ikuspegitik estu-estuki uztarturik sumatzen ditut aroa eta berbak; bestetik, barne-biltzaile berria txertatu dut berton ageri izandako edozein ele aurkitu ahal izateko; azkenik, gure kulturan hain garrantzizkoa den ilargia gora eta behera ikusteko aukera duzue ilargialdiak osatzekotan. Berrikuntzok aipaturik, izenburuan duzuen atsotitzari helduta, kontuz ibili egunotako eguzkiarekin, lagun bat baino gehiago dut eguzkitasunak jota ohean. Hortaz, ohiko moduan euskaldunaren ikuspegi bikoitzarekin egiten dugu topo, euria euri eta eguzkia eguzki, aieneka eta kexaka sarri!