Hau da hau, a zelako astea!

Arraru, Ipar Haizea eta Muthari, Hego Haizea Australiako aborigenentzat

Aste honetan gogait eragiteraino iristeko ziorik ez dugu izan. Dela udaberria, dela Uraren Nazioarteko eguna, dela Meteorologiaren Nazioarteko eguna, dela atzoko Pelloren hitzaldia, dela su-etena... Gainera, Tomaxek komentario batean zuzen eta artez zioenez, Pello Zabala profeta ere bihutu ez zaigu, ba! Ilbeherarekin batera, koskatxo bat sartuko zuela eta... euria gogotik -Bilbo inguruan, behintzat- eta su-etena! Horixe da ilbeherak ekarri duen berria, alajaina! Jakintsu eta txukun jardun zuen Pellok atzo aipatutako hitzaldian, NASAren iragarpenak ala tenporak? Gaian zeharo murgilduta dagoenez gero, dakien guztia erraz helarazten dakiten horietarikoa da. Atsegina izan zen oso. Joandako guztiok pozarren irten ginen eta hemendik aurrera tenporen inguruan jantzixeago.
Bestalde, duela zenbait egun astintzen hasi zigun hego haizeak badirudi hurrengo egunetan bere hartan iraungo duela. Tenporetako lehendabiziko egunean, hortxe ibili ziren jo eta ke hego eta mendebal haizeak firin faran norgehiagoka eta horren arabera, udaberriaren lehenengo zatia horrelakoxea izango zen noiz hego, noiz mendebal, tarteka euria... Asteburu honetan, beraz, hego mendebala jaun eta jabe edo galgoia kostaldeko zenbait herritan esaten duten bezalaxe. Azkuek Hiztegian Bizkaiko kostaldean eta Zumaian erabiltzen zutela adierazi zuen eta orain dela urte gutxi, Eneko Barrutiak berba hori Ondarroen jaso eta Bizkaiko Arrantzaleen Hiztegian agertarazi zuen: suroesta da. Beste inon entzun duzue?