EtnoMet (Aroaren berbaroak)

2004ko azaroaren 1ean sortua. Eguraldiaren gainean mintzatzeko gunea: zer-nolako ikuspegia daukan herriak eguraldiarekiko, zein hitz erabiltzen den ahozko euskaran fenomeno atmosferiko jakinak izendatzeko. Sasoi edo egun batzuetan dagoen eguraldiaren aitzakian, iruzkinak egiteko herri-gunea.

2005/12/12

Frantzi iparra eta haizea

“http://www.metoffice.com/weather/charts/FSXX00T_00.jpg” irudia ezin da bistaratu, akatsak dituelako.


Behin baino gehiagotan agertu izan da blog honetan
frantziparraren kontua, hau da, Europan barrena lehor eta hotz erasaten digun haize mota. Pasa den asteburuan horretarikoa izan bide dugu, baina, alde nabaria izan da itsasaldearen eta barrualdearen artean. Itsasaldean lainotu samarturik egon denez gero, hodeiek lurretiko beroari eutsi eta hotza ez da hainbestekoa izan, aitzitik, barrualdean, oskarbi egonda beroak ihes egin du egurats aldera eta hori dela-eta, hozberoa ez da nolanahikoa izan. Aspalditxoan badirudi frantzipar izendapena hedatu dela, hala ere, zergatik frantzipar eta ez errusipar. Izan ere, behinola esan genuenaren haritik, haize klase horrek Euskal Herriko ipar edo ekialdea zeharkatzen du, beraz.... atera kontuak! Eta errusipar erabiltzen ez bada ere, bai, ordea, rusoa, horixe, behinik behin, jaso baitzuen Candido Izagirrek Oñati aldean: "Viento muy frio, de la cruz de Aloña hacia Zelaizabal".
Frantzia aldeko ipar-eki haizeari dagokionez honako hau bildu dut:

fransaize
: “Frantzia aldetik heldu den haize freskoa”. N-Baztan. Fransaize au otza da. Fransaizeak abarriketzen (hondatzen) gaitu. Mariano Izeta. Baztango Hiztegia.
frantzi-aize, ipar: “Viento muy frio de la cruz de Aloña hacia Zelaizabal. G-Oñati. Candido Izagirre. El vocabulario vasco de Aránzazu-Oñate. (haize rusoa)
frantzipar
: Haizeak ipar-ekialdetik joko du, frantziparra edo ipar beltzaren tankera hartuz. Joxe Landa. GARA, 2003-02-13.

OHARRA: neguko tenporak, aste honetako 14, 16 eta 17an dira eta antza denez, ipar haizea izango da nagusi. Ikusiko dugu!

2 Comments:

  • At 09:18, Blogger Xabi Zalbide said…

    Tenporak e? ia ba, iparzaleak garenoi behintzat ilusio apur bat emango digute, zeren, gainera, ematen du biharko elur eta euri gehixeago ekarriko duela.

    Gero auskalo zer egingo duen, baina nik esperantza handiak ditut antizikloiak kokatzeko duen joera ikusita.

    Momentuz, elurtza handia dago Piriniotan. Ikusi, Kepa, foro batean topatu dudan erreportaia. beharbada argazkiren aprobetxatzeko modukoa duzu.

    Ondo bizi!

     
  • At 13:28, Blogger Kepa Diegez said…

    Aupa, Xabito!
    ea pasa den moduko negurik dugun! Neu ere negu gorriaren zale nauzu. Tenporak lagun... negua ilun. Ondo ibili.

     

Argitaratu iruzkina

<< Home

 
Contador gratis contadorplus.com -----------------------------------------------------------------