Aurten hegoak izan du agintea koarta-tenporak halaxe agindu zutenetik. Orain hilabete, ilgorak ekarri zuen elurtetxo bat, mendietan behera. Halatsu hurrengo aste honetan ere, ilgorak dakar berriro ere okerraren koska. Gure inguruan hegoa ibiliko da, barrualde eta kostalde. Baina, kostan, iparreko latitudeotan beheraka datorren hotza nabarituko da, ez hainbeste hotz mailan, baina bai goikaldeak lainotuagotzen eta ilunagotzen joango direlako, astelehena aurrera doan bestean, eta astearte eta asteazkenetan. (Zozomikoteak bezain fidagarriak egin dira seinale modernoagoa dena, Euskadi Itzuliko karreristak: horiek bai ekartzen dutela euria barrabarra).
Nioena, astelehen-astearte, tenperatura gozo epel emedunak izango badira ere, handik aurrera freskatzen, eta ostegunean hoztutzen, eta ostiralean (egun zoritxar bereziduna ia beti) mendietan behera elurra ere hortxe. Noraino jaitsi daitekeen ezin da seinalatu astebete aurrez, baina koska naturala eta apiril kolorekoa hortxe datorrela, bai. Beraz, asteburu honetan, egiogun hegoari merezi duen despeida ta agurra.
pellozabala
Iruzkinak
Nolanahi ere, eta Kepak Algortan ipini izenburuarekin akordatuz, Nasako ta beste 'zientifikoen' lasa-lana onartuko balitzaigu 'herri jakindurian' murgiltzen garenoi, nahikoa 'prakalas' ibiliko ginateke gu ere. Begira zer zioen aste honen hasieran INMko iragarpen lau egunetarakoak: kontu jakina zen penintsulan gora, astelehenean hasi eta eguraldi kazkartzen bat zetorrela. Zenbat euri bota zezakeen lau egunotan? Mapa zehatz zertzeladaz betetzen zuen egunez egun: eta baita lau eguneko kopuru bat ematen ausartzen zen. Lau egunetan, gehienez ere : 40tik 50 litrotara (10 litroren tartea ez da horrenbestekoa), eta gutxienez bota zezakeena: 0'5tik 5'0 litrotara. Tarte eta hesi horiek hartzekotan, ez da NASAn ikasia izan behar, ez eta 'zientzia gizon' aparta ere, nik uste. Horrenbeste edonork ere, baserritar zein artzain, hesi extuagoetan ohituak ez al gaude, bada? Horrela zetorren, bada, penintsula guztirako iragarrita. Beajondeiela! Eskerrak ez zain inporta guri beste, eguraldiaren trazak gertutik jarraitzea! Tomax, guk ere, horrela... ake baietz!!
Apiril honetan dena dabil hankaz gora. Jesusen pasioa ospatu behar den bezperan zer eta orain Judas zela bere lagunik minena, honek egin zuen traizioa Jesusen beraren enkarguz burutu zuela...
O, tempora!
Tomax.