Martxoa gezurti, gaur euri, bihar eguzki

Urtarrilaren amaierako elurtetxoaren ondoren, otsailaren hasierako ilberriak aro epel eta umela ekarri digu. Otsailaren 17ko ilbetea gorabehera, bere hartan jarraitu du eguraldiak, bustitxo, epeltxo. Martiaren lehenengo egunek segida emango bide diote zezeilari. Hortaz, aroak lehenean iraungo du, nonbait. Inoiz gutxitan egin ohi digu kale aro-atsotiztegiak, gehientsuenetan igarri eta asmatu egiten du. Orotarako dauka konponbidea, bai gero! Zati baten, epaileko aroa otsailekoaren jarraipentzat jotzen du. Adibidez:

Martiko eguraldi, goizean eguzki eta arratsaldean euri.
Martixen goizeko eguzkixe, arratsaldeko eurixe.
Martixen subie ikustea baño, ardi artien otsue ikustea oba.
Martxoa katuille.

Beraz, urratzen ari garen ildoa ikusita, gerta dezagun geure burua zozoilaren oldarrak atzeman ez gaitzan. Izan ere, "zozoila deitzen zaio martxoari, zozokumeak marti-zozoarenak hortxe ibiltzen direlako dagoeneko" (Pello Zabala, Naturaren Mintzoa, 130 or,)