Zestoako hizkera: eguraldia

Opor aurreko egun lainotsu eta lodiotan, batzuk pozik, beste batzuk murko -betiko dikotomia, zer da aro ona eta zer txarra?- eguraldiak mehetu nahian diharduelarik, liburuxka baten berri emango dizuet: Zestoako hizkera, eguraldia. Apirilaren 19an eman zuen beraren berri Asier Sarasua eibartarrak bere blogean -Eibartik- eta gaur hona ekartzea erabaki dut interesgarri suerta dakizuekeelakoan. Zestoa ladea erabiltzen diren hitz eta esaera zenbait dakartza, marrazki dotore-dotorez apainduta. Hitzaurrea Pello Zabalak egin du -Biba Pello, eltze askotako burruntzalia!- eta bilketa lana, besteak beste, Agurtzane Azpeitiak. Liburudendetan salgai ez zegoenez gero -zein gaitza den honelako lanak zabaltzea!- bertako Euskara Zerbitzuko teknikariarengana jo nuen, Nora Palmitano, uste dut argentinarra dela, eta esan zidan udaletxean bertan lor zitekeela 2 euroren truke. Zestoa aldera, oraingoz joan ezina adierazi eta amultsu baino amultsuago etxera igorri zidan jasotzean ordaintzeko. Beraz, eskuratu nahi izanez gero, bi aukera dituzue: bata, Zestoa aldera joan -urruntxo bizi zaretenok txango eginda- eta bestea Norari berari eskatuz. Beraren e-posta hauxe duzue: euskara@zestoa.net . (Nora, barkaidazu lan handia ematen badizut!) Nik dagoeneko berba guztiak datu-basean sartu ditut eta gehienak ezagunak izan arren, beti egoten da baten bat harritzen nauena. Hurrengo batean esango dizuet zein.
Kontent bizi! (Atzo, negar eta guzti egin genuen etxean Bertatik Bertara azken saioa ikusita. Hunkigarria izan zen!)