Zail dago aroa, ez du nahi.

Aspaldi honetan hainbat eta hainbat kexu gabiltza nahi beste euri egiten ez du eta. Lehorgiro da nagusi, zenbait euri xehe eta mehe gorabehera. Tenporek bestelakoa iragartzen baziguten ere, -Zer geratu ote da, Pello?- udaberri hau ohi baino gogorrago dabil, aroa zail dago, ez du nahi. Hori dela-eta, eguraldi gogor honek jarraitzen badu, baserrietan ez ezik, hirietan ere arazoak izan genitzake. Euria egingo ahal du berandu baino lehen! Pello Zabalak, pasa den ostiraleko GARAn argitaraturiko artikuluan zioenez, "eskerrak martxoan erruz bota zuen", bestela gureak egingo zukeen. Arduraturik, bai, izan ere, udaren atarian gara eta badakigu azken urteotako udak oso euritsuak ez direna izaten, aitzitik, lehor-lehorrak eta bero samarrak. Beraz, zeruak tenkor irauten badu...Egoera kezkagarri honetaz baliatuz, hona hemen zenbait esapide adierazgarri:

eguraldia zaildu ad. lok.: N-Baztan. Egualdia zaildu du. (Justo M. Mokoroa). Repertorio de locuciones del habla popular vasca.
gogor adj.: B-Otxandio. Eguraldi gogor onek jarraituten badau.. (Justo M. Mokoroa). Repertorio de locuciones del habla popular vasca.
idorgiro iz.: N-Baztan, Leitza / Lapurtera. (Azkue). Hiztegia.
legorgiro iz.: G-Orokorra. (Azkue). Hiztegia.
sapoltsu adj.: N-Zaraitzu. (Azkue). Hiztegia.
zail egon ad. lok.: Gipuzkera. Zail dago eguraldia / Zail dago; eztu nai. (Justo M. Mokoroa). Repertorio de locuciones del habla popular vasca.
zerua tenkor egon ad. lok.: N-Larraun. Larraunek gogotik egin arren eskari zerua tenkor dago. (Justo M. Mokoroa). Repertorio de locuciones del habla popular vasca.