EtnoMet (Aroaren berbaroak)

2004ko azaroaren 1ean sortua. Eguraldiaren gainean mintzatzeko gunea: zer-nolako ikuspegia daukan herriak eguraldiarekiko, zein hitz erabiltzen den ahozko euskaran fenomeno atmosferiko jakinak izendatzeko. Sasoi edo egun batzuetan dagoen eguraldiaren aitzakian, iruzkinak egiteko herri-gunea.

2006/03/13

Udaberriko tenporak eta beste


Lehengo batean Pello Zabalak zioenez, asteburuko euritea aurrez ikusita bazegoen ere, ostiral gauean Bizkaiko Golkotik sartu zuen ekaitza ez ziguten meteorologoek iragarri. Ez horixe! Txikizio ederrak egin dizkigute haizeteek eta euriteek! Larunbata azkenaldi honetako egunik euritsuena izan ez da, bada! Artikutza aldean igelak ere atertzeko irrikitan. Bitartean, nahi eta nahi ez etxezuloturik, tenporei zegozkien egunen datu meteorologikoak biltzen jardun dugu udaberri alderako iragarpena egitekotan. Espero dut berriz ere lerro hauek Pellok irakurri eta bere iruzkin eta aurreikuspenak egin ditzan. Arozale naizen honek neure txikian ikasitakoa abiarazten ahaleginduko naiz.
Pasa den asteartean genioenaren arabera, asteazkena eta ostirala aintzat hartzen dira urtaroaren lehenengo hilabete eta erdia nola datorren ezagutzeko; hiruhilabetearen bigarren erdialdetik aurrera etorri behar duen aroaz jabetzeko larunbat gaueko azken orduetan jotzen duen haizearen norabideak adierazten du. Larunbatean 24.00ean dabilen haizeak jo egingo du hurrengo urtesasoia hasten denean. Beraz:
Asteazkenean aterri egon zen eta gainera, nahiko epela, haize-dantza polita ibili zen, izan ere, mendebala-iparra nagusi izan baziren ere, une batzuetan eki-haizea eta hego-mendebala gailendu ziren. Ostirala, ostera, euritsua izan zen, asteazkena baino hotzagoa eta gainera gauean haizea harro-harro. Hortaz, martxoaren 23tik maiatzaren lehengo astera arte, tenporen arabera, euria izango da nagusi, tenporetan ipar-mendebala gailendu delako. Bestalde, zenbait egunetan, asteazkeneko aroari esker, eguraldi epel samarra izango bide dugu. Maiatzaren lehenengo astetik ekainaren 23ra arte, aroa ere euritsua eta freskoa ikusten da, haize harrotasunik gabe. Izan ere, larunbateko haizeei dagokienez gero, berriz ere ipar-mendebala atera zen garaile, tenperatura fresko samar, ikaragarrizko hezetasuna eta haizea baretuta. Hortaz, tenpora kontuetan hasi berria naizen honek horrela ikusten dut udara arteko aroa. Betetzen direnentz, ekainean jakingo dugu eta horretarako apurka-apurka apuntatuko ditugu datuak jarraipena egitekotan. Pello, mesedez, lagundu ea zer sumatzen duan hik!
Amaitzeko, gaur EtnoMet-en 202. artikuluxka idazten nabil. Ez nuen nik pentsatzen horrenbeste idatziko nuenik. Ezta hurrik eman ere!

3 Comments:

  • At 15:55, Blogger Patxi said…

    Baietz beste 202 idatzi.

    Aupa Kepa!

     
  • At 17:32, Anonymous Anonimoa said…

    Hik daukak ekarria, hik! Sarri esan ei diagu norbaitek 'etorria daukala', ("Honek zaukak etorria, honek!")... Hirea, Kepa, etorria bai, baina areago ere baduk: hirea benetako 'ekarria' duk, hainbat kontu atsegin ta jakingarri, hainbat margo, argazki eta erretrato ekartzen dizkigukalako. Uholdeak lagun txarrak dituk belaun-katilutik gora, baina hire uholde edo ujiola ez dadila agor, freskagarri izanen zaiguk eta. 202 zenbaki polita duk, horrek berak eskatzen dik 404, 606, 808... ez al dira politak? Aupa, hi,lagunguko diagu eta.
    Bidenabar, esan, bihar goizean koarta-tenporen ekarritxoa bideratzen saiatuko naizela.
    pellozabala

     
  • At 17:36, Blogger Kepa Diegez said…

    Mila esker anitz, Patxi eta Pello! Zuen hitzek beste hainbat "aroartikulu" idazteko kemena ematen zidatek.

     

Argitaratu iruzkina

<< Home

 
Contador gratis contadorplus.com -----------------------------------------------------------------