Lainope goizetik eta euritsu eguerditik

Atsegin handiz irakurtzen ditut egunero GARAn Joxe Landak egiten dituen aro-iragarpenak; herri-hizkera erabiltzeaz gain, azalpen gozoak eta deskripzio zehatzak egin ohi ditu. Batzuetan hiztegietan nekez topa daitezkeen berba ezin eztiagoez baliatzen da. Maite ditudanetariko bat "hodei sarea" da. Adibidez, "Hodei sareak egongo dira eta zerua lausotuko dute". Hodei sareak goi-goian dauden eta sare antza duten hodei luzexkak bide dira. Ederra hitza, "hodei sarea". Gaur honako eguraldi- iragarpen ederra egin du:

Okerrera joko du nabarmen eguraldiak. Lehen orduetan hego-haize txikiari esker epel samar eta giro goxoa egongo da. Lainope egongo da goizean ere eta sendotzen joango dira hodei horiek, goibelduz. Eguerdi aldean haizea mendebaldetik jarriko da eta euria botatzen hasi ere bai. Arratsaldean galanki botako du zaparrada trumoitsuak tartean direla.

Horra hor era dotorea aro-iragarpenak egiteko herri-lexikoa erabiliz! Zer ikasi asko dugu berarengandik!