Euri-hodeiak

Arrotz samarra bada ere, orain arte ez ditugu inoiz hodeiak aipatu. Aurreko astea gozoa eta hotza izan bazen ere, ezari-ezarian asteburuan hasita etorri zaigu erabateko aldaketa: euria, haizea, hotza, afrontua, gaur, txingor-erauntsiak, negu gorriko aroa, alegia. Elurra ostera ere mendian behera hasiko omen du... Euriz beteriko hodeiei irizteko zenbait izendapen dauzkagu euskalkietan. Herriak zientziak bezain ondo ezagutzen dituenez gero, era askotarikoak bereizten ditu. Hemen euriz beteriko hodei mota bakar batzuk emango ditugu aditzera, belarri eta begien gozagarri. Zuk bereizten ote dituzu?

edoi montor . “Euria dakarten hedoi beltz handiak”. B-Leioa. Bai edoi montorra pai, edoi montorrak bakixu, igual oten da baltza baltza baltzen, ta emen pilo bat eta an beste pilo bat eta, oin garbi dau, oin aitu an garbi garbi in deu, oin estau. Iñaki Gaminde. Leioa Berbarik Berba.

euri-sarta. B-Mundaka. “Arraia formadun lainoak". Eneko Barrutia. Bizkaiko Arrantzaleen Hiztegia.

ilamalta . “Hodei euritsuak”. Erronkariera. Azkue. Hiztegia.

ilemamo . “Hodei euritsuak”. N-Zaraitzu. Azkue. Hiztegia.

jaso. “Hodei euritsuak” . B-Lekeitio. Azkue. Hiztegia.

montor baltz . B-Zamudio, Jatabe. "Montor baltzak: hodei beltzak, euria iragartzen dutenak". Iñaki Gaminde. Zamudio Berbarik Berba.

odai-erru. “Nubarron, mangas de lluvia”. B-Lekeitio. Azkue. Hiztegia.

txaramel . “Hodei oso euritsuak”. B-Ondarroa / G-Hondarribia. Azkue Hiztegia.

zerro. “Hodei oso euritsuak”. B-Ondarroa. Azkue. Hiztegia.